DIAGNOSIA ETA ESTRATEGIA
Azkoitiko Udalak Klima eta Energia Iraunkorraren aldeko Plana onartu du, Izadi 21-ren laguntzarekin
Azkoitiko Udalak Klima eta Energia Iraunkorraren aldeko Plana onartu du behin betiko, iraileko udal osoko bilkuran hartutako erabakiaren bidez. Plana gure enpresaren laguntza teknikoarekin garatu da, eta udalerriko klima eta energia arloko erronkak modu integralean lantzeko oinarrizko tresna izango da.
Udaleko Ingurumen sailak 2022an abiatu zuen klima eta energiaren inguruko diagnostiko-prozesua, eta lan horren ondorioz garatu da orain onartutako plana. Dokumentuak 8 helburu estrategiko eta horiek lortzera bideratutako 83 ekintza zehatz biltzen ditu, 2050erako klima neutraltasunaren helburua gidari hartuta.
Prozesu osoan zehar, parte-hartzea zabala izan da: udaleko ordezkari politikoek eta teknikariek, DBHko ikasleek, Ingurumen Mahaiak eta banakako herritarrek ere hartu dute parte. Izadi 21ek prozesu hori diseinatu eta dinamizatu du, ikuspegi parte-hartzailea bermatuz.
Helburu eta ekintza nagusiak hauek izan dira:
- Energia aurreztea eta eraginkortasuna sustatzea.
- Tokiko energia berriztagarriaren sorkuntza indartzea.
- Mugikortasun jasangarria bultzatzea.
- Klima-aldaketara egokituko diren hiri-plangintzak eta diseinuak sustatzea.
- Osasunaren eta ongizatearen babesa indartzea.
- Natura-ingurunearen zaintza eta kontserbazioa.
- Gobernantza eredu berriak ezartzea.
- Herritarren parte-hartzea eta aktibazioa sustatzea.
Planak, ekintza bakoitzerako arduradunak, lehentasunak eta epeak zehazten ditu. Jasotako ekintzen %58ak klima-aldaketa arintzeko neurriak biltzen ditu, %35ak klima-aldaketara egokitzekoak, eta gainerako %7a herritarren parte-hartzeari lotutakoak dira.
Informazio gehiago: https://azkoitia.eus/es/noticias/12965-udalak-helburu-estrategikoei-erantzungo-dien-83-ekintza-jaso-ditu-klima-eta-energia-planean-2
